حيدربابا ، ايلديريملار شاخاندا
سئللر ، سولار ، شاققيلداييب آخاندا
قيزلار اوْنا صف باغلاييب باخاندا
سالام اولسون شؤوْکتيزه ، ائليزه !
منيم دا بير آديم گلسين ديليزه
حيدربابا ، کهليک لرين اوچاندا
کوْل ديبيندن دووْشان قالخيب ، قاچاندا
باخچالارين چيچکله نيب ، آچاندا
بيزدن ده بير مومکون اوْلسا ياد ائله
آچيلمايان اوْرکلرى شاد ائله
بايرام يئلى چارداخلارى ييخاندا
نوْروز گولو ، قارچيچگى ، چيخاندا
آغ بولوتلار کؤينکلرين سيخاندا
بيزدن ده بير ياد ائيله ين ساغ اوْلسون
دردلريميز قوْى ديكکلسين ، داغ اوْلسون
حيدربابا ، گون داليوى داغلاسين !
اوزون گولسون ، بولاقلارين آغلاسين !
اوشاقلارون بير دسته گول باغلاسين !
يئل گلنده ، وئر گتيرسين بويانا
بلکه منيم ياتميش بختيم اوْيانا
حيدربابا ، سنين اوزون آغ اوْلسون !
دؤرت بير يانين بولاق اوْلسون باغ اوْلسون !
بيزدن سوْنرا سنوْن باشون ساغ اوْلسون !
دوْنيا قضووْ-قدر ، اؤلوْم-ايتيمدى
دوْنيا بوْيو اوْغولسوزدو ، يئتيمدى
حيدربابا ، يوْلوم سندن کج اوْلدو
عؤمروْم کئچدى ، گلنمه ديم ، گئج اوْلدو
هئچ بيلمه ديم گؤزللرين نئج اوْلدو
بيلمزيديم دؤنگه لر وار ، دؤنوْم وار
ايتگين ليک وار ، آيريليق وار ، اؤلوْم وار
حيدربابا ، ايگيت اَمَک ايتيرمز
عؤموْر کئچر ، افسوس بَرَه بيتيرمز
نامرد اوْلان عؤمرو باشا يئتيرمز
بيزده ، واللاه ، اونوتماريق سيزلرى
گؤرنمسک حلال ائدين بيزلرى
نظرات شما عزیزان:
